Vraća me sićanje kad san bi dite: bilo je umjeće popišati cilu slamaricu a izvoltati istinu na odabranog brata

Lipo je kad čovik spava božjun voljun, ma kad se probudi u grihu od pakla, ono, kad grmi i nebo i zemlja, kad ti koćeta pari na magnetišni de', ove povere zemaljske balote, kojoj su sve barbete, svi zadivi, konopi, kad se natežu sva kao de-fera, i kad od mora lađa koja plovi Zadar - Iž u koordinaciji neba ćini alarm u pritnji cine prevozno - privatne karte, e, aviziva te puče božji, oli biž, oli daj limozinu u eurima za oprost griha bludnoga, tvojih i ales tvoga siromaškoga roda ka retaja svekolikih u ostavštini brez božjg navišćenja i plaćene ferte.

Budan, nako, u po sna, pa kontan: masline su rodile, zapovidno parla Marinko, zavisi o pameti i umnosti vlasnika govorenja, od njegove jakosti grla ispod murve, zna anke i sve pošte od parangala, pošte iza puntina na školju, pamti čovik kolika je i komu srića ribarska, bravo: zavisi i o rodu u Ameriki, o turističkoj učinkovitosti, anke i o mistu u crikvi u vrimenu pivanja božje krunice pod - adađo. I sve dependi o škuri-bandi čovikovoj.

Kad smo sve klali na misto, moreš jopet zaspati, moreš zmoliti treći de' Ružarja, moreš i na vrčinu, o glasovanju nimaš apsulutno - ni BE!

I tako ležin u blaženstvu, a to oće reći: na strani koćete ka je bliža vrčini, zove me ova moja da nan je gudin pobiga iz svinjca. I da gudin leži ispod murve. Kala san beštimu, ma u sebi, bila je tucna, ma skrušena srca. Srića, po' sela nam je dalo ruku u hajki, u manevru oko gudina. I da san dežurni u dnevu današnjemu, za primiti cimu na rivi, bravo, aviziva me ova moja. E, i da to ni konop, nako. Ča bilo, da je to cima amerikan-lan, jerbo oporba čini kontrolu. Da konop ako ni primi božji blagoslov, onda primiš cimu ka buzdo – vapor šija, i ča? Skrene provun drito za Ankonu, i ča, i kako? Di smo? Raj, oli paka? Za purgatorij smo: čao beli!

Vraća me sićanje kad san bi dite, kad smo ležali na slamarici ja i brat Božidar i brat Zvonko. Bože, bilo je umjeće popišati cilu slamaricu a izvoltati istinu na odabranog brata. Biran, ka mladić divojku u kolu na fešti Vele Gospe. Ma, i nima nika vela pamet ovo za slamaricu, bitna je beštima, jerbo slamarica i beštima duperaju niki posebni gušt, nije to strišati ašom baštoni, oli bato fantun od špadi na ultimi. To mu dojde ka da si pozvan u Knin, u vojašku rezervu, oli na Sinjsku alku i sidiš u prvin redu, uz prešidenta, ovi, dotišnog, izabranog, i te stvari od izabrane ličnosti.

I najveća je pokora ča će mi mati, neton zvoni z kampanela na malu misu, drito do ispovidaonice i činiti komplet rufijana don Mati kako san popiša i slamaricu i oba brata, Divicu im materinu, i sve te lipe rabote.

E, i ovo moran akužati: da ovce, ni gudin, ni ovan neće titi isti, a ni ležati na popišanoj slami, drži mi mati pridiku ka don Mate z velog oltara, a ja ka u plač, pa, da me boli drob i da mi je meštrovica dala dvicu i četire srdele, e, i sidin u zadnjoj klupi u skuli, i da će mi učiteljica za sve popišano pisati knjigu ćaći u Lojd Jugoslavenski, lipo u Dubrovnik. I, da će mi ćaća cilomu kipaju
broda od Lojda kolektivno pročitati pismo, a da je to ka likarija kuntra mojemu pišulinu i ostale rabote. I da će me ćaća i mati kolektivno dati u Kotare za zeta i dvadeset stupi maslin ča me sleduje, moj de' od starine, e, od mojh pokojnih dida i pradida. I da će mi strti ime i bezime od roda i poroda moga - bodulskog.