Koda i sadar vidin kartulinu u crno-bilen koluru na kojon smo nono Anđelko Suho u trlišu i ja malešan i miškinjast u tuti š njin, di turnamo drof na turnu u dvoru ol kuće di se je nono rodi u Selciman, u Nižetićih, po kazati Palantinih; u dvoru di višje nima ne kuće u kon je moja bižnona Mande porodila mojega nonota Anđelkota. Nismo bili š njiman, Nižetićiman, u svojti; nismo bili u svojti, samo u kofidenci. Koda je to malo!? Digod je to, kofidenca, i puno veće. Od svojte…
Doma smo dognali grožđe iz gore, iz Visoke i Dočin, na tovariman, kenjan i muliman u misiman. Olpremili smo to istrjajuć ga meškon u kaci, doveli grožđe do masta, mast do vina; vino otočili, prilili ga maštiliman kroz pirijot u barile, oli ga kroz kanelu istočili iz badnja, a ni drof ča smo ga iscidili...